سەرۆکی هاوپەیمانیی دەوڵەتی یاسا رایدەگەیەنێت، کراوەن بۆ هاوبەشیی نێودەوڵەتی لەگەڵ وڵاتانی ئەوروپا و ئەمریکا.
نوری مالکی، سەرۆکی هاوپەیمانیی دەوڵەتی یاسا و کاندیدی چوارچێوەی هەماهەنگی بۆ پۆستی سەرۆکوەزیرانی عێراق لە پلاتفۆرمی “X” پۆستێکی کردووە و نووسیویەتی، “بەرپرسیارێتیی نیشتمانیمان بەرامبەر بە گەلەکەمان و زێدی خۆمان، ناچارمان دەکات هەوڵبدەین و خۆمان تەرخانبکەین بۆ راستکردنەوە و بەهێزکردنی رەوتی پڕۆسەی سیاسی”.
ئاماژەی بەوەشکرد، ئێمە باوەڕمان بە عێراقێکی دیموکراسی و مەدەنی هەیە، کە کراوە بێت بە رووی هاوبەشیی نێودەوڵەتیی پتەو لەگەڵ ئەمریکا و وڵاتانی ئەوروپا، ئەم پەیوەندییەش، فراوانکردنی ژێرخان، خزمەتگوزاری و وزە بە دوای خۆیدا دەهێنێت.
رۆژی 24ـی 1ـی 2026، چوارچێوەی هەماهەنگی، کاندیدکردنی نوری مالکی، سەرۆکی هاوپەیمانی دەوڵەتی یاسای بۆ پۆستی سەرۆکوەزیرانی عێراق، راگەیاند.
