قوباد تاڵەبانی رایدەگەیەنێت، لە رۆژی جیهانیی زمانی دایکدا، پیرۆزبایی لە هەموو ئەو نووسەر، شاعیر و خەباتکارانە دەکەین، کە دەیان ساڵە سینە و زاریان كردۆتە قەڵغان لەپێناو پاراستنی زمانی کوردیدا.
قوباد تاڵەبانی، جێگری سەرۆکوەزیرانی هەرێمی کوردستان بڵاویکردەوە، لە رۆژی جیهانیی زمانی دایکدا، پیرۆزبایی لە هەموو ئەو نووسەر، شاعیر و خەباتکارانە دەکەین، کە دەیان ساڵە سینە و زاریان كردۆتە قەڵغان لەپێناو پاراستنی زمانی کوردیدا، وەک سەربازی ون؛ رەنج، تاڵی و مەینەتیی زۆریان بۆ زمانەكەمان چەشتووە، لە ئەمڕۆدا لەگەڵ پارێزەرانی زمان، ئاواتمانە هەموو منداڵانی کورد ئەو مافە سەرەتاییەیان بۆ بەدیبێت، کە پەروەردەكردن و فێركردنە بە زمانی شیرینی کوردی.
وتیشی، ئێستا لە هەرێمی کوردستاندا، ئەركی ئێمە لە زمان پاراستنەوە گۆڕاوە بۆ گەشەپێدانی زمانی کوردی، دەبێت حکومەت و ناوەندە زانستییەكان، بەپێی پلان و چنینێكی هاودەنگ، کاربکەن، تا زمانی کوردی لەگەڵ گۆڕانکاری و پێشکەوتنە زانستی و بەجیهانیبوونەكاندا، برەو بسەنێت، بۆ ئەوەی نەک لە مەترسیی پەراوێزکەوتن و پاشکۆبوون رزگاریبکەین، بەڵکو شانبەشانی زمانە زیندووەکانی جیهان، وەک چۆن ڕەگدارە، وەهاش پایەدار و بەكار بێت.
