لە قەڵادزێ تەرمی منداڵێک گەیەندرایە نەخۆشخانە کە بە وتەی کەسوکارەکەی لە حەمام گیانیلەدەستداوە.
بەڕێوەبەرایەتیی پۆلیسی راپەڕین بڵاویکردەوە، ئێوارەی ئەمڕۆ، تەرمی منداڵێک بەناوی (م. ر. ئـ) تەمەن 9 ساڵان، دانیشتووی قەڵادزێ، گەڕەکی ئاشتی، گەیەندرایە نەخۆشخانەی گشتی.
ئاماژەی بەوەشکرد، بە وتەی کەسوکاری، منداڵەکەیان لە حەمام گیانیلەدەستداوە و گوماندەکەن بەهۆی تەزووی کارەباوە گیانیلەدەستدابێت.
ئەوەشی خستەڕوو، پاش گرتنەبەری رێوشوێنی یاسایی، بۆ زانینی هۆکاری راستەقینەی مردنەکەی، تەرمەکە بەڕێکرا بۆ پەیمانگای پزیشکی دادی سلێمانی، پەڕاوی لێکۆڵینەوەش بۆ رووداوەکە رێکخراوە.
