پاشنیوەڕۆی ئەمڕۆ، شەپۆلێکی چڕی خۆڵبارین گەیشتە ناوچەکانی رۆژئاوا و ناوەڕاستی عێراق و پێشبینی دەکرێت لە چەند کاتژمێری داهاتوودا بگاتە بەشێک لە ناوچەکانی هەرێمی کوردستان و عێراق.
بەگوێرەی پێشبینییەکانی کەشناسیی عێراق، لە هەندێک ناوچە مەودای بینین بۆ کەمتر لە یەک کیلۆمەتر کەمدەبێتەوە و خێرایی با دەگاتە 45 کیلۆمەتر لە کاتژمێرێکدا.
پێشبینیدەکرێت، خۆڵبارینەکە لە چەند کاتژمێری داهاتوودا بگاتە پارێزگاکانی کەرکوک، ئەنبار و سەڵاحەدین.
کەشناسیی عێراق پێشبینیشدەکات کاریگەریی شەپۆلی خۆڵبارینەکە لە کاتژمێرەکانی ئێوارەی رۆژی شەممە تاوەکو بەرەبەیانی رۆژی یەکشەممە بەردەوامی دەبێت و سبەی کۆتاییدێت.
