قوباد تاڵەبانی و باڵوێزی ئەرمینیا پەرەپێدانی پەیوەندییە بازرگانییەکان تاوتوێ دەکەن.
قوباد تاڵەبانی، جێگری سەرۆک وەزیرانی هەرێمی کوردستان، لەگەڵ رۆبین سۆگۆیان، باڵوێزی ئەرمینیا لە عێراق کۆبووەوە و تێیدا پەرەپێدانی پەیوەندییەکانی نێوان هەردوولا لە بوارە جیاوازەکاندا تاوتوێکرا.
لە دیدارەکەدا، هەردوولا باسیان لە پێویستیی کاری هاوبەشکرد بۆ پەرەپێدانی پەیوەندییەکانی نێوان هەرێمی کوردستان و ئەرمینیا، بەتایبەتیش لە بوارەکانی بازرگانی و کەلتوریدا، تاوەکو لەم قۆناغەدا هەنگاوی گرنگ بۆ بەهێزکردنی هاوکارییەکان بنرێت.
هەردوولا هاوڕابوون، کە مێژوویەکی دوور و درێژی پێکەوەژیان لە نێوان هەردوو گەلی کورد و ئەرمەنیدا هەیە، جەختیشیان کردەوە کە ئەم مێژووە دەتوانێت دەروازەیەکی گرنگ بێت بۆ بونیادنانی ژێرخانێکی بەهێزتر لە پەیوەندییەکانی نێوانیان و پەرەپێدانی زیاتری ئاڵوگۆڕە کەلتوری و ئابورییەکان.
