وەزیری دادی عێراق رایدەگەیەنێت، هیچ یەکێک لە زیندانییەکانی داعش ناگوازرێنەوە بۆ زیندانیەکانی سوسە یان چەمچەماڵ.
د. خالید شوانی، وەزیری دادی عێراق، لە لێدوانێکدا رایگەیاند، “هیچ یەکێک لە زیندانییەکانی داعش ناگوازرێنەوە بۆ زیندانی سوسە یان زیندانی چەمچەماڵ، چونکە ئەو زیندانیانە تایبەتن بە تاوانبارانی مەدەنی، ئەوان تیرۆریستن و لە زیندانییەکی بەغداد لەژێر چاودێری چڕدا دەمێننەوە”.
وتیشی، تا ئەم ساتە، پێنج هەزار و 46 زیندانیمان وەرگرتووە و لە داهاتوودا دەگاتە شەش هەزار، سەرجەمیان لە عێراق دادگایی دەکرێن، لیژنەیەکی تایبەت بەو پرسە پێکهێنراوە و سەرجەمیان بەگوێرەی ئەو تۆمەتانەی دراوەتە پاڵیان دادگایی دەکرێن”.
ئەوەشی خستەڕوو، لەگەڵ هاوپەیمانیی نێودەوڵەتیی لە هەماهەنگیداین کە ئەو زیندانیانەی عێراقی نین، بگوازرێنەوە بۆ وڵاتەکانی خۆیان و لەوێ دادگایی بکرێن”.
