بەهۆی لێڵبوونی ئاوی زێی بچووکەوە، پڕۆژەی ئاوی خاس راگیرا و بەڕێوەبەری ئاوی سلێمانییش، روونکردنەوە لەبارەی دروستبوونی کێشە بۆ ئاوی سلێمانی دەدات.
ئەندازیار بەختیار تاهیر، بەڕێوەبەری ئاوی سلێمانی بە تۆڕی میدیایی ئێستای راگەیاند، لە دوو هەفتەی رابردوودا، سێ جار پڕۆژەی ئاوی خاس بەهۆی لێڵبوونی ئاوی زێی بچووکەوە راگیرابوو.
وتیشی، ئەمە کێشەی بۆ ئاوی سلێمانی دروستنەکردووە، چونکە راپەڕین لە بەشی سەرەوەی بەنداوەکە ئاو وەردەگرن، سلێمانییش لە بەشی ژێرەوەی، تەنیا بەشی سەرەوەی بەنداوەکەش کێشەی هەیە.
ئاماژەی بەوەشکرد، ئەم حاڵەتە بەهۆی بارانبارینەوە دروستدەبێت و حاڵەتێکی ئاساییە.
لە ماوەی رابردوودا، بەهۆی لێڵبوونی ئاوی زێی بچووکەوە، کێشە بۆ ئاوی راپەڕین دروستبوو و هاوڵاتییان ئاگادارکرانەوە لە بەکارهێنانی ئاو.
