بەڕێوەبەری بەنداوی دوکان ئاشکرایدەکات، بەهۆی شەپۆلی دابارینی چەند رۆژی رابردوو، ئاستی ئاوی بەنداوەکە 49 سانتیمەتر زیادیکردووە.
کۆچەر جەمال، بەڕێوەبەری بەنداوی دوکان، بە تۆڕی میدیایی ئێستای راگەیاند، لە شەو و رۆژی رابردوودا، ئاستی ئاوی بەنداوەکە 49 سانتیمەتر زیادیکردووە، هەروەها تێکڕای گشتیی ئاستی ئاوی بەنداوەکە تاوەکو ئەمکاتەی ساڵ گەیشتووەتە 11 مەتر.
سەبارەت بە سەرڕێژبوونی بەنداوەکەش، کۆچەر جەمال ئاشکرایکرد، هێشتا کات ماوە و وەرزی دابارین کۆتایینەهاتووە، ئەگەر رێژەی دابارین لە مانگەکانی دوو و سێ باش بێت، ئەوا ئاستی ئاوی بەنداوەکە بە رێژەیەکی باش بەرزدەبێتەوە.
