مەكتەبی سیاسیی یەكێتیی نیشتمانیی کوردستان، لە یادی رۆژی مورافەعە مەزنەكەی سەرۆک مام جەلالدا، پەیامێکی بڵاوکردەوە.
دەقی پەیامەکە:
ئەمڕۆ (9-2) بە سەربەرزییەوە یادی ئەو رۆژە دەكەینەوە كە سەرۆک مام جەلال بە نەخشە و بەڵگەی مێژووییەوە، كوردستانیبوونی كەركوكی سەلماندەوە.
لەو رۆژەی ساڵی 2004ـدا سەرۆک مام جەلال، لە پاڵ هەڵگرتنی هەموو خەمە نیشتمانیی و نەتەوەییەكانی گەلەكەیدا، خەمی دیاریكردنی چارەنووسی ئەو ناوچانە بوو، كە بەر پەلامارەكانی تەعریب و راگواستن كەوتبوون، بۆ سەندنەوەی مافی خاوەنە رەسەنەكانی ئەو ناوچانە و دیاریکردنی سنووری هەرێمی کوردستان لە ناو عێراقیکی فیدراڵدا، دەیویست بە بەڵگەی جوگرافی و مێژوویی، مۆركێكی قانونییان پێببەخشێت.
ئەوەی سەرۆک مام جەلال لەو رۆژەدا ئەنجامیدا، بووە بەردی بناغەی ماددەی 58ـی قانونی ئیدارەی دەوڵەت و دواتریش ماددەی 140ـی دەستوور كە تایبەتبوو بە نەخشەڕێی یەكلاكردنەوەی چارەنووسی ئەو ناوچانەی رژێمی شۆڤێنیی بەعس بۆ شێواندنی دیمۆگرافیا لە كەركوک و چەند ناوچەیەكی ناوەڕاست و باشووری عێراقیش، گرتبوویەبەر.
رۆژی 9-2-2004، بووە مێژوویەكی پرشنگدار لە خەباتی بێوچانی سەرۆک مام جەلال و یەكێتیی نیشتمانیی كوردستان و گەلەکەمان، كە بۆ چارەسەری گشت كێشەیەكی خاوەندارێتیی خاک و مافەکانی گەلی كورد، هەمیشە بژاردەی گفتوگۆ و پێسەلماندنی دروستی دوور لە شەڕ، پەنابردنە بۆ زمانی لێكتێگەیشتن و گفتوگۆ و پشتبەستنە بە سەرچاوە و بەڵگەنامە مێژووییەكان.
یادی سەرۆک مام جەلال بەرز و درەوشاوەبێت و خەباتی سەربەرزی گەلەکەشمان بۆ مافە دەستوورییەکانی بەپێی نەخشەڕێی ماددەی 140ـی دەستوور، تا سەرکەوتنی یەکجاری، درێژەی دەبێت.
