بەڕێوەبەرایەتیی کەشناسیی هەرێمی کوردستان رایدەگەینێت، سبەینێ رێژەی بارانبارین زیاتر و بەهێزتردەبێت، هەروەها لە هەندێک ناوچە هەورەبرووسکە روودەدات.
بەڕێوەبەرایەتیی کەشناسی و بومەلەرزەزانیی هەرێمی کوردستان رایگەیاند، ئەمڕۆ یەکشەممە، ئاسمانی ناوچەکانی هەرێمی کوردستان هەوری تەواو دەبێت، کاریگەریی ئەو شەپۆلی بارانبارینەی رووی لە ناوچەکانمان کردووە بەشێوەی نمەباران و بارانی مامناوەند بەردەوامدەبێت، بەڵام بەراورد بە دوێنێ کاریگەریی بارانەکە کەمێک لاوازتردەبێت، ئەگەری دروستبوونی تەم هەیە لە هەندێک کاتدا، پلەی گەرمیش بەراورد بە دوێنێ کەمێک بەرزدەبێتەوە.
سەبارەت بە کەشی سبەینێ دووشەممە، ئەوەی خستەڕوو، کاریگەریی شەپۆلی بارانبارین لە ناوچەکانمان، بۆ سبەینێ زیاتردەبێت، کەشی ناوچەکانمان هەوری تەواودەبێت و بارانبارین لە سەرجەم ناوچەکان دەبارێت، رێژەی دابارین لە سنووری ئیدارەکانی، سۆران، راپەڕین و زاخۆ زیاتردەبێت، هەندێک کات باران بەشێوەی بەلێزمە دەبارێت، لە سەنتەری پارێزگاکانی سلێمانی، کەرکوک، هەڵەبجە و هەولێر بارانبارین بەشێوەی پچڕپچڕ بەردەوامدەبێت و لە هەندێک کات ئەگەری روودانی هەورەبرووسکە هەیە، لە هەندێک کات خێرایی با دەگاتە سەروو 30 کم/ک.
