سولەیمان و نیرڤان، دوو گەنجی ئاوارەی کوردن؛ ئاهەنگێکی سادەی هاوسەرگیریان لە ناو خوێندنگەیەکی قامیشلۆ ئەنجامدا.
ئەو دوو هاوسەرە کوردە خەڵکی عەفرینن و دوای هێرشی هێزەکانی نزیک لە حکومەتی دیمەشق بۆ سەر ناوچەکانی رۆژهەڵاتی حەلەب، پارێزگای رەققە و دێرەزوور و دواتر کشانەوەی هێزەکانی سوریای دیموکرات لەو ناوچانە، ئاوارەی قامیشلۆ بوون.
لەناو یەکێک لەو پۆلانەی کە کرابووە پەناگەی دەیان خێزانی ئاوارەی کورد، سلێمان و نیرڤان سەرەڕای ئەو هەلومەرجە سەختەی تێیدان، بڕیاری بەردەوامیدان بە ژیانیان دا و مەراسیمێکی سادەی هاوسەرگیرییان رێکخست.
مەراسیمەکە ماتییەکی پێوە دیاربوو، چونکە هیچ گۆرانی و میوزیکێکی تێدا نەبوو؛ ئەمەش رەنگدانەوەی واقیعی ئاوارەبوون و دڵتەنگیی کوردانی ئەو ناوچەیە بوو.
