بەڕێوەبەرایەتیی کەشناسیی هەرێمی کوردستان رایدەگەینێت، لە ئەمڕۆوە باران و بەفر لە سەرجەم ناوچەکانی هەرێمی کوردستان دەستپیدەکاتەوە.
بەڕێوەبەرایەتیی گشتیی کەشناسی و بومەلەرزەزانیی هەرێمی کوردستان رایگەیاند، ئەمڕۆ یەکشەممە، ئاسمان نیمچەهەور و هەندکێ ناوچە هەوری تەواو دەبێت، لە کاتەکانی نیوەڕۆ، سەرەتا لە سنووری پارێزگای دهۆک کاریگەریی شەپۆلێکی بارانبارین و بەفربارین دەستپێدەکات، لە پاشنیوەڕۆ و ئێوارە کاریگەریی ئەم شەپۆلە دەگاتە سەرجەم ناوچەکانمان و شێوازی دابارین هەندێکات نمەبارانی پچڕپچڕ و بارانی مامناوەند دەبێت، هەروەها بەفر لە ناوچە سنووریەکان و ناوچە شاخاوییە بەرزەکان دەبارێت، پلەی گەرمیش بەراورد بە دوێنێ 1 بۆ 3 کەمدەبێتەوە.
ئەوەشی خستەڕوو، سبەى دووشەممە ، کاریگەریی شەپۆلی بارانبارین بە شێوەی نمەباران لەسەر ناوچەکانمان بەردەوامدەبێت، لە هەندێک کاتدا، هەروەها لە ناوچە شاخاوییەکان بەفردەبارێت.
باسی لەوەشکرد، لەگەڵ کاریگەریی ئەم شەپۆلە، پلەی گەرمی بە چەند پلەیەک نزم دەبێتەوە، بە تایبەت لە بەرەبەیانی رۆژی سێشەممە ئەگەری دروستبوونی دیاردەی شەختە دەبێت.
