ئاگادارییەک لە زانکۆی سلێمانییەوە بۆ مامۆستایان و خوێندکاران

زانکۆی سلێمانی ئاگاداری مامۆستایان و خوێندکاران دەکات، ئۆتۆمبێلەکانیان لە شەقامە سەرەکییەکانی دەرەوەی زانکۆ رانەگرن، بەپێچەوانەوە توشی سزای دارایی دەبنەوە.

سەرۆکایەتیی زانکۆی سلێمانی لە راگەیەندراوێکدا بڵاویکردەوە، لەپێناو بەرژەوەندیی گشتی و رێکخستنی هاتوچۆ و بەمەبەستی کەمکردنەوەی قەرەباڵغی و نەهێشتنی ئاستەنگیی هاتوچۆ، بەڕێوەبەرایەتیی هاتوچۆی سلێمانی رێکارەکانی هاتوچۆ لە شەقامە سەرەکییەکانی دەوروبەری زانکۆ جێبەجێدەکات.

زانکۆکە دەشڵێت، “بۆ ئەوەی دووربن لە سزای دارایی و وەک ئەرکێکی شارستانی، تکایە ئۆتۆمبێلەکانتان تەنها لە گەراج و شوێنە تەرخانکراوەکانی زانکۆ رابگرن، چونکە راگرتنی ئۆتۆمبێل لەسەر شەقامە سەرەکییەکانی دەرەوەی زانکۆ قەدەغەیە و لێپرسینەوەی یاسایی بەدوادادێت.”