کەشناسیی هەرێمی کوردستان، رایگەیاند، سبەینێ لە سلێمانی، دهۆک و چەند ناوچەیەکی دیکە بەفردەبارێت.
بەڕێوەبەرایەتیی گشتیی کەشناسی و بومەلەرزەزانیی هەرێمی کوردستان، رایگەیاند، ئەمڕۆ سێشەممە ئاسمان بە گشتی هەور دەبێت و باران دەبارێت لەگەڵ زیادبوونی خێرایی با و دروستبوونی هەورەبروسکە و بەفربارین لەسەر ناوچە شاخاوییە بەرزەکان.
دەشڵێت، بڕی دابارین زیاد دەبێت لە سنووری پارێزگای سلێمانی و دهۆک هەڵەبجە شێوازی دابارین هەندێک کات دەگۆڕێت بۆ بارانی مامناوەند و لێزمەباران، دووبارە بە گشتی کاریگەریی ئەم شەپۆلەی رووی لە ناوچەکەمان کردووە لە دوای نیوەڕۆی ئەمڕۆ چالاکتر دەبێت و لە سەرجەم ناوچەکان باران دەبارێت .
لەبارەی کەشوهەوای سبەینێوە، کەشناسیی هەرێمی کوردستان دەڵێت، سبەى چوار شەممە کاریگەریی شەپۆلی بارانبارین بەردەوامدەبێت باران لە سەرجەم ناوچەکەمان دەبارێت بە بڕی جیاجیا و لەگەڵ هاتنی بارستە هەوایەکی سارد و نزمبوونەوەی زیاتری پلەی گەرمی.
دەشڵێت، سبەینێ لە سەنتەری سلێمانی، دهۆک، ئیدارەی زاخۆ، ئیدارەی سۆران، راپەڕین و زۆربەی ناوچە شاخاوییەکان لە کاتەکانی بەیانییدا بەفردەبارێت و کاریگەریی ئەم شەپۆلە ئێوارەی سبەینێ لەسەر ناوچەکەمان کۆتاییدێت.
