ئەنجومەنی گەڕەکی شێخ مەقسود و ئەشرەفیە چۆڵکردنی گەڕەکەکەیان رەتدەکەنەوە و دەڵێن، لە شوێنی خۆمان دەمێنینەوە و چۆڵی ناکەین.
لە بەیاننامەیەکی ئەنجومەنەکەدا هاتووە، داوا لە گەلەکەمان دەکەین کە لەگەڵمان بوەستن و کۆببنەوە بۆ بەرگریکردن لە گەڕەکەکانمان.
دەشڵێت، مزگەوت، قوتابخانە، نەخۆشخانە، ماڵە مەدەنییەکان، و دامەزراوە خزمەتگوزارییەکان کراونەتە ئامانج، گەلەکەمان و هێزەکانی ئاسایشی ناوخۆمان لە بەرامبەر ئەم هێرشانەدا خۆڕاگرییەکی گەورە نیشان دەدەن.
ئەوەش دەڵێت، هێرشەکان بە مانای گۆڕینی پێکهاتەی دیمۆگرافی شارەکە و تێکدانی رێککەوتنی یەکی نیسانە، بە توندی ئیدانەی بێدەنگیی نێودەوڵەتیی ئەو زلهێزانە دەکەین کە لە رێککەوتنەکانی 10ی ئازار و 1ی نیساندا ئامادەبوون.
ئەنجومەنەکە دەڵێت، ئێمە بڕیارمانداوە لە گەڕەکەکانمان بمێنینەوە و بەرگری لێبکەین متمانەمان بە حکومەتی دیمەشق نییە.
