ئیسرائیل و سوریا لەسەر پێکهێنانی شانەیەکی هاوبەش بۆ هەماهەنگیکردن لەسەر چەند پرسێک، لەنێویاندا ئاڵوگۆڕکردنی زانیاریی هەواڵگری و کەمکردنەوەی گرژییە سەربازییەکان لەنێوان هەردوو وڵاتدا، رێککەوتن.
ئەمشەوی سێشەممە، وەزارەتی دەرەوەی ئەمریکا، بەیاننامەی هاوبەشی ئەمریکا، ئیسرائیل و سوریای بڵاوکردەوە کە تێیدا ناوەڕۆکی کۆبوونەوەی بەرپرسانی باڵای ئیسرائیل و سوریا لە پایتەختی فەرەنسا، لەخۆدەگرێت.
بەیاننامە هاوبەشەکە ئاماژەی بەوە کردووە کە “بەرپرسانی باڵای ئیسرائیل و سوریا لە ژێر چاودێریی ئەمریکا لە پاریس کۆبوونەتەوە”، ئەوەش هاتووە، “ئیدارەی ترەمپ ئاسانکاریی بۆ گفتوگۆی بەرهەمدار کردووە سەبارەت بە رێزگرتن لە سەروەریی خاکی سوریا و ئاسایشی ئیسرائیل”.
بەگوێرەی بەیاننامە هاوبەشەکە، “ئیسرائیل و سوریا پابەندبوونی خۆیان بۆ گەیشتن بە میکانیزمێکی هەمیشەیی دووپاتکردووەتەوە بۆ سەقامگیریی هەردوو وڵات و دروستکردنی شانەیەکی هاوبەش بۆ هەماهەنگیی هەواڵگری و کەمکردنەوەی گرژی و پەرەسەندنەکان”.
لە کۆتایی بەیاننامەکەی ئەمریکا-ئیسرائیل-سوریادا هاتووە، “واشنتن هەنگاوە ئەرێنییەکانی نێوان ئیسرائیل و سوریا بەرز دەنرخێنێت و پابەندبوونی خۆی بۆ پشتیوانیکردن لە جێبەجێکردنیان، دووپاتدەکاتەوە”.
