قوباد تاڵەبانی رایگەیاند، پێویستە هەموو وانە وەربگرن لە ناتەبایی و ناکۆکییەکانی ساڵانی رابردوو.
قوباد تاڵەبانی، جێگرەی سەرۆکوەزیرانی هەرێمی کوردستان پیرۆزبایی هاتنی سەری ساڵی نوێی زاینی “لە هەموو لایەک” دەکات و ئاماژە بەوەدەکات، “هیوادارین ساڵی 2026 ساڵێکی پڕ لە خۆشی و دەستکەوت بێت بۆ خەڵکی کوردستان و هەموومان پێکەوە کاربکەین بۆ خزمەتکردن و ئاوەدانترکردنەوە و گەشەپێدانی وڵاتەکەمان لە هەموو روویەکەوە”.
نووسیویشیەتی، پێویستە هەموو لایەک بە وانەوەرگرتن لە ناتەبایی و ناکۆکییەکانی ساڵانی رابردوو کە زیانی بە پێگەی کورد و هەرێمی کوردستان گەیاندووە، لە ساڵی نوێدا لاپەڕەیەکی نوێ هەڵبدەنەوە و لە جیاتیی چەقبەستن لە ناکۆکییەکانی رابردوو، بە هەستی بەرپرسیارێتییەوە کاربکرێت بۆ دروستکردنەوەی متمانە و رێکخستنەوەی ناوماڵی کوردی. چونکە بە یەکڕیزی و یەکگوتاری، باشتر دەتوانرێت کێشەکانی نێوان هەرێم و بەغداد چارەسەربکرێت و داکۆکی لە ماف و داواکارییە دەستوورییەکانی خەڵکی کوردستان بکرێت”.
