د. خالید حەیدەر، هەرێمی کوردستان توانیویەتی لە هەندێک بابەتی وەک خۆراک و شمەکدا بگاتە ئاستی خۆبژێوی.
د. خالید حەیدەر، مامۆستای بەشی ئابوری لە زانكۆی سلێمانی لە لێدوانێكدا بە تۆڕی میدیایی ئێستای راگەیاند، لە هەندێک بوار و بابەتی وەک گۆشت، گۆشتی مریشک، هێلکە، گەنم، جۆ، چیمەنتۆ و غاز، هەرێمی کوردستان ئاستی بەکاربەری تێپەڕاندووە و گەیشتووەتە ئاستی خۆبژێوی، هەروەها ئەوەی کە زیادە هەناردەی باشووری عێراق و دەرەوەی عێراق دەکرێت.
وتیشی، ئەمە ئەو واتایە دەدات کە هەرێمی کوردستان لە رووە ئابورییەکەوە لەسەر ئاڕاستەیەکی راست و دروست دەڕوات، ئەمەش وادەکات وردەوردە بەرەو ئەوە هەنگاو بنێت کە بۆ کاڵا و شمەکەکانی دیکەش بگاتە ئاستی خۆبژێوی.
ئەوەشی خستەڕوو، لە رابردوودا ئەو دۆلارەی ئاڕاستەی دەرەوە دەکرا و بەرهەمی لە دەرەوە پێدەکڕدرا، ئێستا ئاڕاستەکەی بەرەو ناوەوەیە و لە پڕۆژەی جیاوازی وەبەرهێناندا خەرجدەکرێت.
