تۆڕی داکۆکی لە داکۆکیکاران لە سلێمانی رایدەگەیەنێت، بە ئامانجی سیاسی و حزبی، لە هەرێمی کوردستان ژنان لە بوارە جیاوازەکاندا دەکرێنە ئامانج.
تۆڕی داکۆکی لە داکۆکیکاران لە سلێمانی، لە بەیاننامەیەکدا رایگەیاند، بەداخەوە لە ژینگەی میدیایی هەرێمی کوردستاندا، شەپۆلی شکاندن و تـ.ـیرۆری فیکری، ناوزڕاندن و سوکایەتیپێکردن رووبەڕووی کەسایەتیی چالاکوانانی ژن و رێکخراوەکانی ژنان، ناوبەناو سەرهەڵدەدات، کارەکتەرانی ژن لە بوارەکانی سیاسی، ئابوری، کۆمەڵایەتی و کاری رێکخراوەیی دەکرێنە ئامانج. (هیچ لایەنێک خۆی لە قەرەی ئەم بابەتە نادات و هەمووان بێدەنگ و بێهەڵوێستن).
ئاماژەی بەوەشکرد، ئامانجی سەرەکیی ئەو هەڵمەتە رێکخراوانەی کە لە سۆشیاڵ میدیادا دژ بە ژنان رێکدەخرێن، بێ کاریگەرکردنی رۆڵ و پێگەی ژنانە لە کۆمەڵگەدا و عەقڵیەتی چەقبەستووانەی نێرسالارانە داینەمۆی هەڵمەتەکانە، کە هەندێکجار ئامانجی سیاسی و ململانێی ناوخۆیی حزب و لایەنە سیاسییەکانی لە پشتەوەیە و لەشکرێکی پارەدارکراو و ئەرکدارکراو لە سۆشیاڵ میدیادا، ئەنجامی دەدەن و ژنان و کەسایەتیی ژنان دەکرێنە نیشانەی ئامانجەکانیان.
ئەوەشی خستووەتەڕوو، لێرەوە وێڕای ئیدانەکردنی هەر هەوڵ و هەڵمەتێکی چەواشەکارانە و نایاساییانەی دژ بە ژنان و ناوزڕاندنیان، داوادەکەین لایەنە پەیوەندیدارەکان، لە سەروویانەوە، دەسەڵاتی دادوەری و سەرۆکایەتیی داواکاری گشتی و دامەزراوەکانی تایبەت بە بەرەنگاربوونەوەی تـ.ـوندوتیژی دژی ژنان، لەو هەڵمەتانە بێدەنگ نەبن و رێکاری پێویستی یاسایی و کارگێڕی و تەکنیکی لە دژیان بگرنەبەر، بۆ ئەوەی ژنان بە گشتی و ژنانی چالاکوان لە بوارە جیاجیاکاندا، بتوانن بە ئازادی و لە چوارچێوەی یاسادا کاربکەن.
داواش لە رێکخراوەکانی کۆمەڵگەی مەدەنی و رێکخراو و سەندیکا پیشەییەکان و رۆشنبیران و ئازادیخوازان دەکات، “پشتیوانی هەوڵەکانی ژنان بن بۆ سەرخستنی خەبات لەپێناو یەکسانی و سڕینەوەی هەموو مۆرکێکی جیاکاری لەسەر بنەمای رەگەزی لە کۆمەڵگەدا”.
