لەپێناو ئاشکراکردنی بڕی ئەو هاوکارییە داراییانەی پێشکەش بە لێقەوماوانی لافاوەکەی چەمچەماڵ و دەوروبەری کراوە، وێبسایتی هاوکاریی کوردانە کاراکرا.
عەتا محەمەد سەرۆکی کۆمسیۆنی فریاگوزاری و بوژانەوەی چەمچەماڵ رایگەیاند، لە پێناو پەیڕەوکردنی ئەوپەڕی شەفافیەتدا، لە رێگەی وێبسایتی هاوکاریی کوردانە سەرجەم داتا و زانیاریەکانمان دەخەینە بەردەست راگەیاندنەکان و دامەزراوە رەسمییەکان و خەڵکی کوردستان، تاکو هەمووان وەک چۆن بەشداربوون لە پشتیوانی زەرەرمەندانی لافاوەکە، ئاوهاش ببینن کە هاوکارییە داراییەکانیان چۆن تۆماردەکرێت و چۆن خەرجیشدەکرێت بۆ خەڵکی چەمچەماڵ.
ئاماژەی بەوەشکرد، لە وێبسایتەکەدا سەرجەم داتاکانی بەخشینی کۆمپانیا بەخشەرەکان و هاوڵاتییانی کوردستان و کەمپینی شار و شارۆچکەکان لەخۆ دەگرێت، 24 کاتژمێر و سات بە ساتی هاتنی هەر بڕە پارەیەک بۆ سەر هەژماری بانکییەکانی (کۆمسیۆنی فریاگوزاری و بوژانەوەی چەمچەماڵ) لە بانکی چەرموو و بانکی جیهان نوێدەکرێتەوە.
