بەڕێوەبەرایەتیی کەشناسیی هەرێمی کوردستان بڵاویکردەوە، سبەینێ لە بەشێک لە ناوچەکانی هەرێم بارانبارین دەستپێدەکات.
بەڕێوەبەرایەتیی کەشناسی و بومەلەرزەزانیی هەرێمی کوردستان بڵاویکردەوە، ئەمڕۆ دووشەممە ئاسمان لەنێوان ساماڵ و پەڵەهەور دەبێت، لە کاتەکانی درەنگ ئاسمان بەرەو هەوری تەواو دەگۆڕێت بەتایبەتی لە ناوچەکانی رۆژئاوای هەرێمی کوردستان (پارێزگای دهۆک) لەگەڵ دەستپێکردنی نمە بارانی کەم لە ناوچە سنووریەکانی رۆژئاوا، لە ناوچە شاخاوییەکان پلەی گەرمی نزمدەبێتەوە.
ئاشکراشیکرد، سبەینێ سێشەممە ئاسمان بەگشتی هەوری تەواو دەبێت لەگەڵ نمە باران لەکاتەکانی بەیانی لە ناوچە جیاجیاکانی پارێزگای دهۆک پاشان کاریگەریی درێژدەبێتەوە بۆ ناوچە شاخاوییەکانی ئیدارەی سەربەخۆی سۆران و پارێزگای هەولێر لەگەڵ ئەگەری نمە بارانێکی کەم لە سەنتەری شاری هەولێر.
باسیلەوەشکرد، بەفر لە زۆربەی ناوچە شاخاوییە بەرزەکان دەبارێت بەتایبەتی لە ناوچە سنوورییەکان، پاشان بۆ کاتەکانی درەنگانی شەو کەش سەقامگیر دەبێتەوە.
