ئەنجومەنی سیاسیی نیشتمانیی سوننەکان کۆدەبنەوە و بڕیار لەبارەی کاندیدی پۆستی سەرۆکی ئەنجومەنی نوێنەران دەدەن.
رۆژنامەی سەباحی نیمچە رەسمی عێراق بڵاویکردەوە، بڕیارە ئەمڕۆ یەکشەممە ئەنجومەنی سیاسیی نیشتمانیی حزبە سونییەکان کۆبوونەوەیەکی چارەنووسساز بۆ دیاریکردنی کاندیدی سەرۆکی ئەنجومەنی نوێنەرانی عێراق ئەنجامبدەن.
سەڵاح مەرعاوی ئەندامی هاوپەیمانی عەزم بە رۆژنامەکەی راگەیاندووە، کۆبوونەوەکە لە بارەگای موسەننا سامەرائی سەرۆکی هاوپەیمانێتییەکە ئەنجامدەدرێت، ئامانج لێی ئەوەیە کاندیدێک یان دووان بۆ پۆستی سەرۆکی ئەنجومەنی نوێنەران دیاریبکرێت.
جەختیشیکردەوە، گفتوگۆکان لەنێو هەر پێنج لایەنی سوننی هاوپەیمانێتییەکە بەردەوامە، بەڵام تا ئێستا هیچ ناوێک بۆ کاندید دەستنیشاننەکراوە.
بەپێی عورفی سیاسی لە عێراق پۆستی سەرۆکی ئەنجومەنی نوێنەرانی عێراق پشکی لایەنە سونییەکانە و پێویستە ئەوان کاندید بۆ ئەو پۆستە دەستنیشانبکەن و دواتر لە ئەنجومەنی نوێنەران دەنگی پێبدرێت.
