بەڕێوەبەرایەتیی هاتوچۆی سلێمانی، داوا لە شۆفێران دەکات شاڕێی سەرەکیی بازیان بەکارنەهێنن.
بەڕێوەبەرایەتیی هاتوچۆی سلێمانی لە ئاگادارییەکدا بڵاویکردەوە، بەھۆی بارانبارینی زۆر و بەلێزمە، ئاستەنگێکی زۆر لە شاڕێی سەرەکیی بازیان بە ئاراستەی سلێمانی و بەپێچەوانەوە دروستبووە، بەتایبەت نزیک چێشتخانەی کانی شەیتان.
ئاماژەی بەوەشکرد، بەمەبەستی پاراستنی سەلامەتیی شۆفێران و ئۆتۆمبێلەکانیان، داواکارین تا ئاساییبوونەوەی دۆخی کەشوھەوا، ئەو شەقام و شاڕێیە بەکارنەھێنن. مەفرەزەکانی ھاتوچۆ لەو سنوورەدا لە ئەرکدان و بەپێی تایبەتمەندی، ئەرکەکانیان جێبەجێدەکەن و ھاوکاریی شۆفێران دەکەن.
هاتوچۆی سلێمانی دەشڵێت، لەسەر فەرمانی پارێزگاری سلێمانی، بەشێوەیەکی کاتی بازگەی تاسڵوجە بە رووی شۆفێراندا داخرا و دۆخەکە لەژێر چاودێریدایە و بە ئاساییبوونەوەی دۆخی کەشوھەوا، رەوشی ھاتوچۆش ئاساییدەکرێتەوە و لە رێی راگەیاندنی بەڕێوەبەرایەتیی ھاتوچۆی سلێمانی، ئاگاداری بڵاودەکرێتەوە.
ئەوەش هاتووە، لە هەر حاڵەتێکی نەخوازراودا، دەتوانن لە رێی ژمارەی کۆنترۆڵی ھاتوچۆی سلێمانی 188، داوای ھاوکاری بکەن.
