سەرۆکایەتیی کۆماری عێراق، رایگەیاند، هیچ زانیارییەکمان لەبارەی بە تیـ.ـرۆریست ناساندنی دوو گروپەوە پێنەگەیشتووە.
سەرۆکایەتیی کۆماری عێراق رایگەیاند، هیچ زانیارییەکمان لەسەر بڕیاری بە تیرۆریست ناساندن و سڕکردنی پارە و سامانی “ئەنساروڵڵا” و “حزبوڵڵا”ی لوبنان نییە.
دەشڵێت، “ئەو جۆرە بڕیارانە رەوانەی سەرۆکایەتیی کۆمار ناکرێن، بەڵکو تەنیا ئەو یاسایانە بۆ وردبینی و پەسەندکردن دەنێردرێن کە لە ئەنجومەنی نوێنەرانەوە دەنگدانیان لەسەر دەدرێت، لەگەڵ مەرسومە کۆمارییەکان”.
لە راگەیەندراوەکەدا ئەوەش هاتووە، بڕیارەکانی ئەنجومەنی وەزیران و لیژنەی سڕکردنی پارەی تیرۆریستان و لیژنەی سپیکردنەوەی پارە و رێنماییەکانی هیچ لایەنێک بۆ سەرۆکایەتی کۆمار نانێردرێن.
