پێنج لایەنە سەرەکییەکەی سوننە لە بەغداد کۆبوونەوە و ئەنجومەنی سیاسیی نیشتمانییان پێکهێنا.
لە راگەیەندراوی کۆبوونەوەکەدا هاتووە، لە روانگەى بەرپرسیارێتیی نیشتمانی و هەستکردن بە قەبارەى ئەو ئاستەنگییانەى رووبەڕووى وڵات بوونەتەوە، سەرکردەى هاوپەیمانێتى و حزبە سوننییە سەرکەوتووەکان لە هەڵبژاردن (حزبى تەقەدوم، حزبى عەزم، هاوپەیمانیی سیادە، هاوپەیمانیی حەسم و حزبى جەماهیر) بە دەستپێشخەرىی خەمیس خەنجەر لە بەغداد کۆبوونەوە و تاوتوێى دوا پەرەسەندنە سیاسییەکانى وڵات و ئاڵنگارییەکان، بەتایبەت پارێزگا سوننییەکانیان کرد.
جەختیش لە گرنگيى یەکخستنى هەوڵەکان و کارکردن بە دیدى هاوبەش بۆ پاراستنى سەقامگیریی سیاسى و کۆمەڵایەتى و گرەنتیی مافە دەستوورییەکان و بەهێزکردنى نوێنەرایەتیی لە دامەزراوەکانى دەوڵەت، کرایەوە.
بەگوێرەى راگەیەندراوەکە، حزب و هاوپەیمانێتییە بەشدارەکانى کۆبوونەوەکە، رێککەوتن لەسەر پێکهێنانى ئەنجومەنى سیاسیی نیشتمانی، وەک چەترى کۆکەرەوەى هەمووان و یەکخستنى دیدگا و بڕیارەکان لە ئاست سەرجەم دۆسیە نیشتمانییە جیاوازەکان و بەهێزکردنى کارى هاوبەش لەنێوان سەرکردەکان و کوتلە سیاسییەکان، کە ببێتە مایەى خزمەتکردنى بەرژەوەندییەکانى جەماوەر و بەرزکردنەوەى رۆڵى سیاسى.
