بەڕێوەبەرایەتیی ئاسایشی پارێزگای سلێمانی دەستگیرکردنی تۆمەتباری رووداوی کوشتنەکەی شەوی رابردووی عەلوەی سلێمانی، رادەگەیەنێت.
بەڕێوەبەرایەتیی ئاسایشی پارێزگای سلێمانی لە راگەیەندراوێکدا بڵاویکردەوە، شەوی 20ـی 11ـی 2025، دوای دروستبوونی کێشە و دەمەقاڵێ لەنێوان دوو شۆفێری بارهەڵگر لە رێگەی نێوان کەلار – سلێمانی و بە گەیشتنیان بە عەلوەی سلێمانی، دووبارە گرژی دەکەوێتە نێوانیان، یەکێک لە شۆفێرەکان بە (دەڕنەفیز) هێرشدەکاتە سەر شۆفێری بەرامبەری و بە سەختی برینداری دەکات، دوای گەیاندنی بە نەخۆشخانە، بەهۆی سەختیی برینەکەیەوە، گیان لەدەستدەدات.
ئاماژەی بەوەشکرد، دەستبەجێ لەسەر رووداوەکە لێکۆڵینەوە و بەدواداچوونی ئاسایش دەستیپێکرد، تۆمەتباری رووداوەکە خۆی رادەستی بەڕێوەبەرایەتیی ئاسایشی سلێمانی کرد.
ئەوەشی خستەڕوو، لەئێستادا تۆمەتبار بە بڕیاری دادوەری لێکۆڵینەوەی ئاسایش و وبە ماددەی 406 لە یاسای سزادان، راگیراوە و لێکۆڵینەوە لە دۆسیەکەی بەردەوامە.
