راوێژکارێکی سەرۆکوەزیرانی عێراق رایدەگەیەنێت، بڕیاری راگرتنی هاوردەکردنی نەوت، بەنزین و گاز لە وڵاتانی دەرەوە، پێنج ملیار دۆلار قازانجی دەبێت بۆ ئابوریی عێراق.
مەزهەر محەمەد ساڵح، راوێژکاری سەرۆکوەزیرانی عێراق بۆ کاروباری ئابوری بە میدیای رەسمیی عێراقی راگەیاند، “ئەم بڕیارە لە مێژووی مۆدێرنی پیشەسازیی عێراقدا بێوێنەیە، یەکەمجارە لەم دوو دەیەی کۆتادا بڕیارێکی لەو شێوە گرنگ بدرێت، کە بەهۆیەوە ئابوریی عێراق ببوژێتەوە”.
وتیشی، “ئەم بڕیارە رێگردەبێت لە خەرجکردنی پارەیەکی زۆری عێراق و سوودێکی زۆری بۆ ئابوریی وڵاتەکە دەبێت، هەروەها بە تێکڕا ساڵانە نزیکەی پێنج ملیار دۆلاری عێراق دەپارێزێت”.
باسی لەوەشکرد، “سوودێکی دیکەی بڕیارەکە بەرزکردنەوەی تێکڕای داهاتی ساڵانەی تاکە بە نزیکەی %3”.
ئەمەش پاش ئەوەدێت، 4ی تشرینی دووەمی 2025، بە بڕیاری سەرۆکوەزیرانی عێراق، هاوردەکردنی بەنزین، گاز و نەوتی ماڵان بۆ عێراق راگیرا، دوای ئەوەی پاڵاوگەی بێجی لە پارێزگای سەلاحەدین، جارێکی دیکە کرایەوە.
