بەڕێوەبەرایەتیی گشتیی کارەبای سلێمانی رایدەگەیەنێت، لە رێگەی زیادکردنی ئاشکراوە، هەڵدەستێت بە فرۆشتنی 13 موڵکی چاڤی لاند.
بەڕێوەبەرایەتیی گشتیی کارەبای سلێمانی لە راگەیەندراوێکدا ئاشکرایکرد، لەسەر راسپاردەی وەزیری کارەبای حکومەتی هەرێم، لە رێگەی زیادکردنی ئاشکراوە هەڵدەستێت بە فرۆشتنی 13 موڵکی چاڤی لاند، سەرجەمی ئەو موڵکانە لە کەرتی یەکی مەڵکەندی و دەباشانن، هەروەها بە ناوی کۆمپانیای چاڤی بۆ وەبەرهێنانی گەشتیاریی – هاوپشکی تایبەت، تۆمارکراون.
ئاماژەی بەوەشکردووە، فرۆشتنی ئەو موڵکانە لەبەرامبەر قەرزی خاوەن قەرزدایە کە وەزارەتی کارەبایە، بڕەکەی سێ ملیار و 580 ملیۆن و 210 هەزارە.
ئەوەشی خستەڕوو، زیادکردنەکە لە ماوەی 30 رۆژ و پاش بڵاوکردنەوەی ئەم راگەیاندنە ئەنجامدەدرێت.
