بەڕێوەبەری راگەیاندنی فڕۆکەخانەی نێودەوڵەتیی سلێمانی، رایگەیاند، هەفتانە چوار گەشت لەنێوان سلێمانی و تورکیا ئەنجامدەدرێن.
دانا محەمەد، بەڕێوەبەری راگەیاندنی فڕۆکەخانەی نێودەوڵەتیی سلێمانی، بە تۆڕی میدیایی ئێستای راگەیاند، دوای هەڵگرتنی گەمارۆی ئاسمانی لەسەر فڕۆکەخانەی سلێمانی لەلایەن دەسەڵاتی فڕۆکەوانیی شارستانیی تورکیا و دوای رێکخستنەوەی خشتەی گەشتەکان لەلایەن هێڵی ئاسمانیی تورکیش ئێرلاینەوە، ئەمشەو یەکەم گەشت بۆ فڕۆخانەی سلێمانی ئەنجامدەدرێت.
وتیشی، دوای ئەوەی بۆماوەی نزیکەی دووساڵ و نیو گەشتە ئاسمانییەکانی نێوان سلێمانی و تورکیا راگیران، کاتژمێر 1:10 خولەک فڕۆکەکەی تورکیا دەگاتە فڕۆکەخانەی سلێمانی و لە کاتژمێر 2:40 خولەکی بەرەبەیان لە فڕۆکەخانەی سلێمانییەوە بەرەو تورکیا دەفڕێت.
باسی لەوەشکرد، بەگوێرەی خشتەی گەشتەکان هەفتانە چوار گەشت لەنێوان سلێمانی و ئیستانبوڵ ئەنجامدەدرێن.
