بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیی لە ئیلبروس کوتراشیڤ، باڵیۆزی روسیا لە عێراق کرد.
لە دیدارێکدا دۆخی گشتیی هەرێمی کوردستان و عێراق تاوتوێکرا و جەخت لە بەردەوامیی گفتوگۆی بونیادنەرانەی نێوان لایەنەکان کرایەوە بۆ رووبەڕووبوونەوەی ئاڵنگارییەکان و پاراستنی سەقامگیری لە ناوچەکەدا.
پەیوەست بە هەڵبژاردن، دووپات لە ئەنجامدانی هەڵبژاردنێکی پاک و بێگەرد کرایەوە کە زامنی پاراستنی مافی هەمووان بکات و ببێتە مایەی بوژاندنەوەی زیاتری وڵات.
دۆخی سوریا و رۆژئاوای کوردستان بیروبۆچوونیان لەبارەوە ئاڵوگۆڕکرا و سەرۆک بافڵ جەختی لە پاراستنی مافی هەموو نەتەوە و پێکهاتەکان کردەوە، بەتایبەتی کورد وەک نەتەوەیەکی سەرەکی و رایگەیاند، دەبێت رێز لە تایبەتمەندیی رۆژئاوای کوردستان بگیرێت و لە چوارچێوەی دەستوورێکی نوێدا مافی گەلەکەمان بپارێزرێت.
