سەرپەرشتیاری کەرکوک-سەڵاحەدینی یەکێتی، رایگەیاند، “کەرکوک چەپکە گوڵەکەی سەرۆک مام جەلالە، رێگە بە هیچ کەس و لایەنێک نادرێت ئارامیی ئەو شارە تێکبدات”.
ئاسۆ مامەند، سەرپەرشتیاری کەرکوک-سەڵاحەدینی یەکێتیی نیشتمانیی کوردستان، رایگەیاند، ماوەی چەند رۆژێکە چەند کەسێکی سەر بە چەند لایەنێکی ناسراو لە شارۆچکەی پردێ لە هەوڵی نانەوەی پیلان و ئاژاوەگێڕییدان، و دەیانەوێت بە بیانووی جۆراوجۆر دۆخی سەقامگیری سنوورەکە تێکبدەن.
دەشڵێت، “هاوڵاتییانی خۆشەویستی کەرکوک بەتایبەتی خوشک و براکانمان لە پردێ دڵنیادەکەینەوە کە رێگە بە هیچ کەس و لایەنێک نادرێت لە ژێر هیچ ناو و ناونیشانێکدا ئارامیی کەرکوک تێکبدات، بە پێچەوانەوە رێوشوێنی یاسایی لە دژی هەموو ئەو کەس و لایەنانە دەگیرێتەبەر کە بیەوێت هەوڵی پیلانگێڕی یاخود ئاژاوەگێڕی بدات لە سنوورەکەدا”.
ئاسۆ مامەند ئەوەش دەڵێت، بە لای یەکێتییەوە کەرکوک چەپکە گوڵەکەی سەرۆک مام جەلالە، و هەموو لایەک لە ماف و ئەرکدا وەک یەکن، رێگە نادەین برایەتیی نێوان پێکهاتەکانی کەرکوک بشێوێندرێت و بۆیە داواکارم هەمووان دان بە خۆتاندا بگرن و ئارامیی بپارێزن.
