محەمەد شیاع سودانی، سەرۆک وەزیرانی عێراق پەیوەندییەکی تەلەفۆنیی لە ڤلادیمێر پوتن، سەرۆکی رووسیاوە پێگەیشت.
نووسینگەی راگەیاندنی سەرۆکی ئەنجومەنی وەزیرانی عێراق بڵاویکردەوە، لە پەیوەندییە تەلەفۆنییەکەدا، باس لە پەیوەندییە دووقۆڵییەکان و یەکەمین لوتکەی عەرەبی و رووسیایان تاوتوێکرد.
بەپێی راگەیەندراوەکە، هەردوولا رێککەوتن لەسەر دواخستنی لوتکەکە، کە بڕیاربوو لە 15ـی 10 بەڕێوەبچێت، بۆ وادەیەکی دیکە، ئەمەش لەبەر رۆشنایی چالاکییە سیاسییە ناوچەیی و نێودەوڵەتییەکانی پەیوەست بە ئاگربەستی غەززە.
“پوتن پشتیوانیی خۆی بۆ هەوڵەکانی سودانی بۆ دەستەبەرکردنی سەقامگیری لە ناوچەکە و برەودان بە پەیوەندیی ستراتیجیی نێوان وڵاتانی عەرەبی و روسیا، دووپاتکردەوە”، لە راگەیەندراوەکەی نووسینگەی سەرۆکی ئەنجومەنی وەزیرانی عێراقدا هاتووە.
سودانی جەختیکردەوە، “عێراق کاردەکات بۆ ئەوەی لوتکەی عەرەبی و روسیا، بکاتە سەکۆیەک بۆ بەهێزکردنی هاوبەشییە نێودەوڵەتییەکان و پێشخستنی گەشەپێدانی نیشتمانی لە وڵاتانی عەرەبی و پاڵپشتیکردنی کەرتەکانی ئابوری، وزە و وەبەرهێنان”.
