بۆ ساڵی دووەم لە ریزبەندیی زانکۆکانی عێراق زانکۆی سلێمانی پلەی یەکەم و لە ریزبەندی زانکۆکانی جیهان پلەی 1001-1200 ی بەدەستهێنا.
د. کۆسار محەمەد سەرۆکی زانکۆی سلێمانی لە کۆنگرەیەکی رۆژنامەوانیدا رایگەیاند، “زانکۆی سلێمانی بۆ ساڵی دووەم و لەسەر یەک لە ریزبەندیی زانکۆکانی جیهان کە لەلایەن دامەزراوەی تایمزی بەریتانیەوە ئەنجامدراوە، پلەی یەکەم لەسەر ئاستی زانکۆکانی سەرتاسەری عێراق و پلەی 1001-1200 لە کۆی 2191 زانکۆی ریزبەندکراوی جیهان بەدەستهێنا”.
ئاماژەی بەوەشکرد، “داوامان لە حکومەتی هەرێم کردووە سەربەخۆیی ئیداری و زانستی بە زانکۆکە ببخەشێت تا بتوانێت زیاتر پێشبکەوێت”.
