نیوەڕۆی ئەمڕۆ 29 ی کانوونی دووەم، لە کاتی یاریکردندا بۆمبێک بە چەند منداڵێکدا لە ناحیەی گوڵاڵە تەقییەوە و یەکێک لە منداڵەکان گیانی لە دەستدا.
سەرچاوەیەکی ئاگادار لە ڕوداوەکە، بە تۆڕی میدیایی ئێستای ڕاگەیاند، “ڕوداوەکە لە گەڕەکی وەحدە ڕویداوە لە ناحییەی گوڵاڵە و کاتێک منداڵەکان یاریان کردووە بۆمبەکە تەقیەوەتەوە، کە سەرەڕای گیان لە دەستدانی یەکێکیان چەند منداڵێکی دیکەش بریندار بوون”.
منداڵەکان بە ڕەگەز عەرەبن و دوای ڕوداوەکە بریندارەکان گەیەندراونەتە نەخۆشخانە، بەڵام تا ئێستا نازانرێت تەندروستیان جێگیرە یان نە.
ماوەی شەش ساڵە ناحیەی گوڵاڵە لە چەکدارانی داعش پاککراوەتەوە، بەڵام بەهۆی سستی ئاوادانکردنەوەی ناحیەکەوە تا ئێستاش لە هەندێک ناوچە بۆمبی چێندراو ماون و دوای شەش ساڵ هێشتا مەترسین لەسەر ژیانی ئەو کەسانەی گەڕاونەتەوە ناحیەکە.
