پسپۆڕێکی وردی هەناسەدان و سییەکان، هاوڵاتییان ئاگاداردەکاتەوە کە وەرگرتنی ڤاکسینی ئەنفلۆنزا پشتگوێ نەخەن.
د. زانا دزەیی، پسپۆڕی وردی هەناسەدان و سییەکان، ئاشکرایکرد، پێویستە ئەم کەسانەی ئەم دۆخ و نەخۆشییانەیان هەیە وەرگرتنی ژەمەکانی ڤاکسینی ئەنفلۆنزا پشتگوێ نەخەن:
– ئەو کەسانەی نەخۆشیی رەبۆیان هەیە
– تووشبووانی هەوکردنی درێژخایەنی سییەکان
– ئەو کەسانەی جگەرە دەکێشن
– تووشبووانی هەر نەخۆشییەکی دیکەی درێژخایەنی سییەکان
– ئەو کەسانەی نەخۆشییە درێژخایەنەکانی دڵ یان گورچیلەیان هەیە
– ئەو کەسانەی لە سەروو تەمەنی 65 ساڵییەوەن
– تووشبووانی شێرپەنجە
– ئەو کەسانەی بە هەر هۆکارێک بێت سیستمی بەرگریی جەستەیان لاوازە
ئاماژەی بەوەشکرد، پێویستە لەم مانگەوە تاوەکو کۆتایی مانگی تشرینی دووەم، ژەمی ڤاکسینی ئەنفلۆنزا وەربگرن، بەمەش بە رێژەی %60 تووشبوونیان بە ئەنفلۆنزا و خراپتربوونی دۆخی نەخۆشییەکانیان، کەمتردەبێتەوە.
وتیشی، ڤاکسینەکە لە هەندێک لە بنکە تەندروستییەکان، نەخۆشخانەکان و سەنتەری نەخۆشییە گوازراوەکان بەردەستە، ئەم ڤاکسینە سەلامەتە و، لێکەوتەکانی زۆر کەمن.
