دەزگای ئاسایشی هەرێم رایدەگەیەنێت، دوای بەدواداچوون و کۆکردنەوەی زانیاریی ورد، توانییان بکەرانی رووداوی تەقەکردن لە رۆژنامەنووس (هێمن مامەند) دەستگیربکەن.
دەزگای ئاسایشی هەرێم لە راگەیەندراوێکدا بڵاویکردەوە، شەوی 2ـی 9ـی 2025، رۆژنامەنووس و چالاکوان (هێمن مامەند) لە گەڕەکی عەقاریی شاری سلێمانی، لەلایەن دوو کەسی ماتۆڕسوار کە دانیشتووی هەولێر-بنەسڵاوەن، بە ناوەکانی (ش، ر، م، س) و (س، ه، ر، م) درایە بەر دەستڕێژیی گوللە و بە دوو فیشەک بریندارکرا.
ئاماژەی بەوەشکرد، لەسەر ئەم رووداوە، بە بڕیاری دادوەر و بەپێی ماددەی (31/406) لە یاسای سزادانی عێراقی، فەرمانی دەستگیرکردن بۆ تۆمەتبارانی رووداوی تەقەکردنەکە دەرچووە و بەپێی بەڵگەکان، ئەندامانی تیمەکەیان دەستگیرکراون و دوو تۆمەتباری دیکە لە ئەنجامدەرانی تاوانەکە، بەرەو پارێزگای هەولێر هەڵاتوون.
دەشڵێت، لە ئەنجامی لێکۆڵینەوەکان دەرکەوت کۆی پیلانەکەیان بەرنامە بۆ داڕێژراوبووە بۆ تاوانێکی رێکخراو، مەبەستیان تیرۆرکردنی چالاکوان و رۆژنامەنووس (هێمن مامەند) بووە.
دەزگای ئاسایشی هەرێم باس لەوەشدەکات، لە داهاتوودا وردەکاریی پیلانەکە و زانیاری لەسەر بکەرانی ئەم هەوڵی تیرۆرکردنە، بۆ رای گشتی دەخرێتەڕوو.
