بەڕێوەبەرایەتیی کارەبای سلێمانی بڵاویکردەوە، لە چوارچێوەی پڕۆژەی رووناکی، لە ئێوارەی ئەمڕۆوە کۆی گەڕەک و پڕۆژەکانی نیشتەجێبوون لە سەنتەری شاری سلێمانی کارەبایان دەبێتە بەردەوام و 24 کاتژمێری.
بەڕێوەبەرایەتیی کارەبای سلێمانی لە راگەیەندراوێکدا بڵاویکردەوە، لە چوارچێوەی پڕۆژەی رووناکی بۆ دابینكردنی كارەبای بەردەوام بۆ هاوڵاتییان، لە ئێوارەی ئەمڕۆوە تەواوی گەڕەکەکانی سەنتەری سلێمانی كە پێنج زۆنە و ژمارەیان 32 گەڕەكە، لەگەڵ پڕۆژەكانی نیشتەجێبوون، كارەبایان دەبێتە 24 كاتژمێری و بەوەش كۆی گەڕەكەكانی سەنتەری شاری سلێمانی كارەبایان بووە بەردەوام.
ئاماژەی بەوەشدا، هەر ئێوارەی ئەمڕۆ كارەبای قەزای قەرەداغ و گوندەكانی دەوروبەری، ناحیەی عەرەبەت و گوندەكانی دەوروبەری كارەبایان دەبێتە 24 كاتژمێری.
باسی لەوەشکردووە، بەگشتی لە پارێزگای سلێمانی 351 هەزار هاوبەشی کارەبا و ملیۆنێک و 450 هەزار هاوڵاتیی سلێمانی لە پڕۆژەی رووناكی سوودمەند بوون و كارەبایان بووە بە 24 كاتژمێری، هەروەها لە سنووری پارێزگای سلێمانی 602 مۆلیدە کوژاوەیەوە.
