قوباد تاڵەبانی رایگەیاند، کورد کەلتورێکی ژیاندۆست و ئاشتیخوازی هەیە و هەرگیز ماندوونابێت لە هیچ هەوڵێک بۆ دابینکردنی مافە رەواکانی.
قوباد تاڵەبانی، جێگری سەرۆک وەزیرانی هەرێمی کوردستان، لە دووەم رۆژی کۆنفرانسی هاوپەیمانیی سۆسیال دیموکراتی وڵاتانی عەرەبی لە سلێمانی، رایگەیاند، کورد کەلتورێکی ژیاندۆست و ئاشتیخوازی هەیە، لەگەڵ ئەوەی هەرگیز ماندوونابێت لە هیچ هەوڵ و خەباتێک بۆ دابینکردنی مافە رەواکانی، بەڵام بەدرێژایی مێژووش، پێشوازیی لە هەر دەستێک کردووە کە بۆ ئاشتی درێژکرابێت، هەربۆیە، کورد نەک هەڕەشە نییە بۆ هیچ لایەک، بەڵکو دەرفەتێکی گەورەیە بۆ چەسپاندنی دیموکراسی و پێکەوەژیان لە هەموو ناوچەکەدا.
وتیشی، “جەختمکردەوە ناوچەکەمان بەبێ دیموکراسی و دابینکردن و رێزگرتن لە مافەکانی هەموو پێکهاتە جیاوازەکان، هەروەها بەبێ پێداچوونەوە بە شێوازی حکومڕانی پێشناکەوێت و ئاشتی و خۆشگوزەرانی بۆ گەلانی ناوچەکە بەدی نایەت”.
