سەرۆکی لقی هەولێری یەکێتیی مامۆستایانی کوردستان رایدەگەیەنێت، بۆ ساڵی نوێی خوێندن کێشەی کەمی مامۆستا لە ناوەندەکانی خوێندن لە هەرێم دروست دەبێت.
عیسا حسێن سەرۆکی لقی هەولێری یەکێتیی مامۆستایانی کوردستان رایگەیاند، “بۆ ساڵی نوێی خوێندن دوو کێشەی گەورە هەیە، کە یەکەمیان کێشەی دابەشنەکردنی مووچەیە، کێشەی دووەمیان کێشەی کەمی ژمارەی مامۆستای میلاکە لە ناوەندەکانی خوێندن”.
ئاماژەی بەوەشکرد، لە ناوەڕاستی خوێندنی ساڵی رابردوو ژمارەیەکی زۆر مامۆستا خانەنشین بوون، هەرچەندە ساڵی پار هەرچۆنێک بوو خوێندن تەواوکرا، بەڵام بۆ ئەمساڵی خوێندن کێشەکە زۆر جدییە و دەبێت چارەسەربکرێت.
ئاشکراشیکرد، زۆرینەی ئەو مامۆستایانەی خانەنشین بوون لە ناوەندەکانی خوێندنی ناوشارەکان بوون، کە وەزارەتی پەروەردە تا ئێستا هیچ بڕیارێکی نییە بە مامۆستای گرێبەستی نوێ یاخود بە مامۆستای میلاک پڕیبکاتەوە.
