شارەزایەکی کەشناسی رایگەیاند، لە کۆتایی مانگی نۆ یەکەم بارانی ئەمساڵ دەبارێت.
پشتیوان پێنجوێنی، شارەزای کەشناسی، بە تۆڕی میدیایی ئێستای راگەیاند، لە ئیدارەی راپەڕین و شاری سلێمانی و بەشێکی ناوچەکانی دیکەی هەرێمی کوردستان لە رۆژی 14 و 15 و 16ی مانگ – لە هەندێک کاتدا بای باکوور مامناوەند بۆ بەهێز چالاکی دەبێت، خێرایی باکە 35 بۆ 55 کیلۆمەتر لەکاتژمێرێکدا دەبێت و بەپێی شوێن و کات گۆڕانکاری روودەدات.
وتیشی، مەودای 16ی مانگ بۆ 24ی مانگ بەگشتی لە هەرێمی کوردستان شەپۆلی گەرمای بەهێز دەکشێتەوە، مانگی 9 پلەکانی گەرما لە ئاستێکی ئاساییدا دەبن، ئەمساڵ زووتر فێنکی و سەرما دەستپێدەکات، لە 15 رۆژی کۆتایی مانگی 9 ئەگەر هەیە یەکەم بارانی ئەمساڵ لە بەشێکی ناوچە شاخاوییەکان و ناوچەی جیا جیا ببارێت.
