لقی سلێمانیی سەندیکای رۆژنامەنووسانی کوردستان، داواکارییەکی ئاراستەی سەرجەم کەناڵ و سۆشیال میدیاکان کرد.
لە داواکارییەکەدا هاتووە، “پاش ئەوەی رووداوێکی نەخوازراو لە یەکێک لە بەنزینخانەکانی ھەولێر روویدا و دەنگۆیەکی ئێجگار گەورەی لێکەوتەوە، زۆربەی کەناڵەکانمان ڤیدیۆی رووداوەکەیان گواستەوە و ئێستاش دەیگوازنەوە”.
ئەوەشخراوەتەڕوو، لە سەروبەندی ئەم رووداوەدا، شەپۆلێکی راسیزمانەی لەلایەن ھەردوولاوە لێکەوتووەتەوە و رۆژبەڕۆژ بەرەو ناخۆش و ناخۆشتر دەڕوات و بێھیواین لەوەی بیری لۆجیک زاڵ ببێت بەسەر تایەفەگەریی و توندەڕەویدا.
دەشڵێت، “بۆیە سەرباری ئەوەی نەدەبوو ئەو ڤیدیۆیە بەو فراوانییە بڵاوببێتەوە، بەڵام ئێستا بە ناچارییەوە داواتان لێدەکەین ھەوڵی تەواو بدەن ئەو گرتەیە بسڕنەوە و لەوە زیاتر کێشەی نەتەوەیی و راسیزمی بۆ ئێمەی کورد و برا عەرەبەکانمان دروست نەکات”.
