پێكهاتەكانی باكوور و رۆژهەڵاتی سوریا داوای داڕشتنی دەستوورێکی دیموکراسیی نوێیان کرد و رایانگەیاند دەبێت سیستمێکی نا ناوەندیش دابمەزرێندرێت.
لە کۆتایی کۆنفڕانسەکەیاندا بە ناونیشانی “یەك هەڵوێستی پێكهاتەكانی باكووری سوریا” کە لە شاری حەسەکە بەڕێوەچوو، بەیاننامەیەکیان بڵاوکردەوە و داوای داڕشتنی دەستوورێکی دیموکراسیی نوێیان کرد کە گەرەنتیی فرەیی و بەشداریی سیاسی دادپەروەرانە بۆ هەموو پێکهاتەکانی وڵات دەستەبەربکات و سیستمێکی نا ناوەندیش دابمەزرێنێت و رێز لە تایبەتمەندییە کەلتووری و جوگرافییەکان بگرێت.
جەختیان لەوە کردەوە، فرەچەشنی نەتەوەیی و ئایینی و کەلتووری لە باکووری رۆژهەڵاتی سوریا، نوێنەرایەتیی سەرچاوەی هێز و دەوڵەمەندییە نەک هەڕەشە، داوای پێداچوونەوەش بە بەیاننامە دەستوورییەکەی دیمەشق دەكەن کە چاوەڕوانیی سورییەکان بۆ ئازادی و شكۆمەندی بەدیناهێنێت.
ئەوەشخراوەتەڕوو، پێکهاتەكان لەژێر دەستی رژێمە ناوەندییەكان، بە تایبەتی لە سەردەمی رژێمی پێشوودا، دەیان ساڵ پەراوێزخران، ئەو کارانەشی دەرهەق بە دانیشتووانی ناوچە کەناراوییەکان و سوەیدا و مەسیحییەکان ئەنجامدەدرێن دەگاتە ئاستی تاوانی دژ بە مرۆڤایەتی و پێویستی بە لێکۆڵینەوەی بێلایەنانە هەیە.
لە کۆتاییدا پێکهاتەکان پێزانینی خۆیان بۆ هێزەکانی سوریای دیموکرات دەربڕی و بە هۆکاری سەرەكیی بونیادنانی سوپای نوێی نیشتمانیی سوریا ناویان بردووە، هاوكات پابەندبوونی خۆیان بە دەرئەنجامەکانی رێککەوتنی مەزڵوم عەبدی، سەرۆکی هێزەکانی سوریای دیموکرات و ئەحمەد شەرع، سەرۆکی سوریا و کۆنفرانسی یەکڕیزی کورد دەربڕی، وەک هەنگاوێک بەرەو کۆدەنگیی نیشتمانی.
