قوباد تاڵەبانی، جێگری سەرۆك وەزیران پێشوازیكرد لە محەمەد ئەلحەسان، نوێنەری تایبەتی سكرتێری گشتیی نەتەوەیەكگرتووەكان لە عێراق و لە كۆبوونەوەی نێوانیاندا چەند پرسێكی جێی بایەخی هەردوولا تاوتوێكران.
لە تەوەرێكی كۆبوونەوەكەدا كە رۆژی سێشەممە لە هەولێر بەڕێوەچوو، باس لە دوایین هەوڵەكانی پێكهێنانی كابینەی نوێی حكومەتی هەرێم كرا و هەردوولا هیوایان خواست لە ماوەیەكی نزیكدا حكومەتی نوێ پێكبهێنرێت.
لەم چوارچێوەیەدا، جێگری سەرۆك وەزیران بە ئاماژەدان بە دۆخی ناوخۆی هەرێمی كوردستان و هەروەها ئەو هێرشانەی لە ماوەی رابردوودا كرانەسەر ژێرخانی ئابوری كوردستان، بەپێویستی زانی پەلەبكرێت لە پێكهێنانی حكومەتێكی بەهێز و یەكگرتوو كە لەلایەكەوە بتوانێت لە ئاستی جێبەجێكردنی داواكارییەكانی هاوڵاتییاندابێت و لەلایەكی دیكەشەوە بە هاوكاری و هەماهەنگیی لەگەڵ حكومەتی عێراق و لایەنە پەیوەندیدارەكان سەقامگیریی كوردستان بپارێزێت.
سەبارەت بە رێككەوتنی نێوان هەرێم و بەغداش لەسەر پرسی مووچە و هەناردەكردنەوەی نەوت، قوباد تاڵەبانی جەختیكردەوە لەسەر پێویستیی پابەندبوونی هەردوولا بە جێبەجێكردنی رێككەوتنەكەوە.
