وتەبێژی حکومەتی عێراق رایگەیاند، بۆ هەناردەکردنی نەوت رێگای دیکە هەیە.
باسم عەوادی، وتەبێژی حکومەتی عێراق، رایگەیاند، رێککەوتنی نێوان هەردوو حکومەتی عێراق و هەرێم رووداوێکی گەورە و ناوازەیە و قۆناغێکی نوێ دەهێنێتە کایەوە کە تێیدا دەستوور و پابەندییە یاساییەکان پێش هەر رێککەوتنێکی سیاسی دەکەون.
وتیشی، بەپێی رێککەوتنەکە، هەرێمی کوردستان پابەنددەبێت بە رادەستکردنی 230 هەزار بەرمیل نەوت بە سۆمۆ و پاشان داهاتەکەی دەخرێتە گەنجینەی گشتیی حکومەتی عێراق.
لەبارەی کۆتاییهاتنی رێککەوتنی نێوان عێراق و تورکیا بۆ هەناردەکردنی نەوت، باسم عەوادی، رایگەیاند، “رێگای جێگرەوە بۆ هەناردەکردنی نەوتی هەرێم هەیە”.
رێککەوتنی نێوان عێراق و تورکیا بۆ هەناردەکردنی نەوتی هەرێم لەڕێگەی بەندەری جەیهانی تورکیا، لە 27ی ئابی 1973 بە هەردوو زمانی تورکی و عەربی واژووکراوە و لە 24 ماددە پێکهاتووە.
دوێنێ رەجەب تەیب ئەردۆغان، سەرۆک کۆماری تورکیا رایگەیاند، درێژە بە رێککەوتنی نێوان وڵاتەکەی لەگەڵ عێراق بۆ هەناردەکردنی نەوت نادات.
