قوباد تاڵەبانی، جێگری سەرۆك وەزیران لەگەڵ لیو جیون، كونسوڵی گشتیی چین لە هەرێمی كوردستان كۆبووەوە و پێكەوە لەبارەی چەند پرسێكی جێی بایەخی هەردوولا گفتوگۆیان كرد.
لە كۆبوونەوەكەدا كە رۆژی پێنجشەممە بەڕێوەچوو، قوباد تاڵەبانی سوپاسی هاوكارییەكانی حكومەتی چینی كرد بۆ هەرێمی كوردستان، بە تایبەت لەڕووی پەرەپێدانی توانا مرۆییەكان و گەشەپێدانی ئابورییەوە و هیوای خواست لە داهاتوودا كاری زیاتربكرێت بۆ ئەوەی ژمارەیەكی زیاتر لە هاوڵاتییانی هەرێم سوودمەند بن لە بەرنامەی پەرەپێدانی تواناكان.
لە بەشێكی دیكەی كۆبوونەوەكەدا باس لە پەیوەندییەكانی هەرێم و بەغداد كران و جێگری سەرۆك وەزیران رێككەوتنی هەرێم و بەغداد لەبارەی چارەسەركردنی كێشەی مووچە و هەناردەكردنەوەی نەوتی بۆ كونسوڵی چین روونكردەوە و جەختیكردەوە كە حكومەتی هەرێم ئامادەیە هەموو كێشەكان بەپێی دەستوور لەگەڵ بەغداد چارەسەربكات.
