ئەندامێکی ئەنجومەنی نوێنەرانی عێراق رایدەگەیەنێت، دوای نووسراوەکەی وەزیری دارایی عێراق بۆ راگرتنی خەرجکردنی مووچەی هەرێم چەندجارێک قسە لەگەڵ سەرۆک وەزیرانی عێراق کراوە.
دارا سێکانیانی، ئەندامی ئەنجومەنی نوێنەرانی عێراق لە لێدوانێکدا بە تۆڕی میدیایی ئێستای راگەیاند، ئەو نووسراوەی تەیف سامی، وەزیری دارایی عێراق کە ئاراستەی هەرێم کراوە، روونە و باسی داهاتی نەوتی و نانەوتیی هەرێمی کوردستان دەکات.
وتیشی، دوای نووسراوەکە چەندجارێک لەڕێی ئەنجومەنی نوێنەران و لیژنەکانەوە، قسە لەسەر محەمەد شیاع سودانی، سەرۆک وەزیرانی عێراق کراوە، بەڵام تاوەکو ئێستا هیچ رێککەوتنێک نەکراوە.
ئاماژەی بەوەشکرد، ئێستا کێشەی سەرەکی لەسەر دۆسیەی نەوتە و هەرێم داوای بڕێک نەوت دەکات کە بۆ بەکارهێنانی ناوخۆ بەکاریبهێنێت، بەڵام عێراق بڕێکی کەمتری دیاریکردووە.
ئەو ئەندامەی ئەنجومەنی نوێنەران ئەوەشی ئاشکراکرد، “زۆرینەی جیاوازییەکانی هەردوو رەشنووسەکەی هەرێم و بەغداد، لە دۆسیەی نەوتدا بووە”.
