عیماد ئەحمەد، ئەندامی مەكتەبی سیاسیی یەكێتی و لێپرسراوی مەكتەبی راگەیاندن و هۆشیاری رایگەیاند، یەكێتی لە بەرامبەر پێشهات و ئاڵنگارییەكانی ناوچەكە، سیاسەت و ستراتیژی نیشتمانیی و واقیعیانە پەیڕەودەكات و هەموو هەوڵەكانیشمان لە چوارچێوەی چارەسەری ئاشتییانەی كێشە و قەیرانەكاندایە، تەئكیدی لەوەشكردەوە كە هەرگیز نەبووینە و ناشبینە هۆی ئاڵۆزتركردنی دۆخەكە بەڵكو یارمەتیدەر و پشتیوانی بەرقەراركردن و پاراستنی سەقامگیری دەبین، بەگەرمیش پێشوازی لە بڕیاری وەستانی شەڕ و ئاگربەست دەكەین و بە هەنگاوێكی باشی دەزانین بۆ پاراستنی ئارامی رۆژهەڵاتی ناوەڕاست و رێگریكردن لە گرژییەكانی سنوورەكە.
سەبارەت بە ئەركی میدیاییش لەم قۆناغەدا، عیماد ئەحمەد تەئكیدی لە پەیڕەوكردنی سیاسەتێكی سەنگینی هاوسەنگ لەسەر بنەماكانی ئیتیك و پیشەی راگەیاندن كردەوە و راگەیاندنكارانی یەكێتی راسپارد وەك هەمیشە رۆڵی نیشتمانی و میدیایی خۆیان بەوپەڕی هەستكردن بە بەرپرسیارێتی بگێڕن بە ئاڕاستەی چارەسەركردنی كێشەكان و پاراستنی یەكگوتاری و وتیشی، نابێت میدیای یەكێتی بەشێك بێت لە كێشەكان، بەڵكو وەك هەمیشە دەبێت رۆڵی سەرەكیی هەبێت لە چارەسەر و گەیاندنی دەنگی خەڵك و لەسەر هەمان سیاسەتی راست و دروستی یەكێتی پەیامە میدیاییەكان بگەیەنن.
