سەرۆک وەزیرانی ئیسرائیل رایگەیاند، تەواوی بەرنامە ئەتۆمییەکەی ئێرانیان خاپوورکردووە و جەختدەکاتەوە، ئەگەر تاران دووبارە بونیاتی بنێتەوە، ئەوا جارێکی دیکەش لەناوی دەبەنەوە.
بنیامین ناتانیاهۆ، سەرۆک وەزیرانی ئیسرائیل لە کۆنفرانسێکی رۆژنامەوانیدا رایگەیاند، “هێرشە لەناکاوەکەمان بۆسەر ئێران، دەچێتە ناو مێژووی جەنگەکانەوە، چەندین فەرماندەی باڵا و زانای ئەتۆمیی ئێرانمان کوشت”.
ئاماژەی بەوەشکرد، “ئێران لە جددیەتی دۆخەکە تێگەیشتووە و دانی بە نیگەرانیی خۆیدا ناوە”.
ناتانیاهۆ لە درێژەی قسەکانیدا ئەوەشی وت، “پێشتر بەڵێنمدابوو کە ناهێڵین ئێران چەکی ئەتۆمی بەدەستبهێنێت، بۆ ئەوەش هێرشمانکردووەتە سەر دەیان شوێنی پەیوەست بە بەرنامەی ئەتۆمیی ئێران و لەناومان بردوون. بەشداریی ئەمریکاش لە هێرشەکاندا، مێژوویی بوو”.
سەرۆک وەزیرانی ئیسرائیل وتیشی، “ئەگەر ئێران هەوڵی بونیاتنانەوەی بەرنامە ئەتۆمییەکەی بدات، ئێمە دووبارە تێکی دەدەینەوە”.
