شارەزایەکی بواری کەشناسی و بوومەلەرزەزانی رایدەگەیەنێت، پلێتی تەکتۆنی عەرەبی جووڵا و پێشبینیدەکات، بوومەلەرزەیەک لە چەند ناوچەیەک؛ لەناویاندا هەرێم، رووبدات.
سیروان سالح، شارەزای بواری کەشناسی و بوومەلەرزەزانی بڵاویکردەوە، نیوەڕۆی ئەمڕۆ دووشەممە، جووڵەیەکی پلێتی عەرەبی تۆمارکرا، بە روودانی بومەلەرزەیەکی تاڕادەیەک بەهێز لە باشووری یەمەن، بەگوڕی 4.9 پلە به پێوەری رێختەر و لە قوڵایی 10 کیلۆمەتر.
ئاماژەی بەوەشکرد، روودانی ئەم بوومەلەرزەیە، هۆکارە بۆ جووڵانی پلێتی عەرەبی بەرەو هەریەک لە پلێتەکانی (زاگرۆس و تۆرۆس).
ئەو شارەزایە پێشبینیشدەکات، لە ماوەی نێوان ئەمڕۆ تاوەکو هەفتەیەک، ئەگەری روودانی بوومەلەرزەی پلەی نێوان (+3 تاوەکو +5) هەیە، لە بەشێکی ئەم ناوچانەی لای خوارەوە:
– زۆربەی ناوچەکانی ئێران (بە زۆری باشوور، رۆژئاوا و کەنارەکانی دەریای قەزوین و کەنداو).
– ناوچە سنوورییەکانی رۆژهەڵاتی عێراق و هەرێم.
– باکووری کوردستان، رۆژئاوای سووریا، دەریای مەیت، کەنداوی عەقەبە و بەشێکی دەریای سوور.
– خودی ناوچە تێکشکاوەکانی باشووری وڵاتی یەمەن و عومان و رۆژهەڵاتی ئەسیوبیا و کەنداوی عەدەن.
