میدیاکانی ئێران بڵاویانکردەوە، کەمێک پێش ئێستا دەنگی چەند تەقینەوەیەک لە تاران، ئەسفەهان و شیراز بیسترا و سوپای ئیسرائیلیش دەڵێت، چەند دامەزراوەیەکی ئەتۆمیمان کردە ئامانج.
کەناڵی (ئێران ئینتەرناشناڵ) بڵاویکردەوە، دوای ئەوەی سوپای ئیسرائیل هۆشدارییدا لە دەستپێکردنی هێرشێکی بەرفراوان بۆ سەر تاران، دەنگی چەند تەقینەوەیەک لە ناوچە جیاوازەکانی پایتەخت، لەوانە (شەهرەک غەرب، سەعدات ئاباد، پووناک، ئێکبەتان و چیتگار) بیستراوە.
دەشڵێت، سیستەمی بەرگریی ئاسمانیی ئێران، لە ناوچەکانی رۆژئاوا و رۆژهەڵاتی تاران چالاککراوە.
بەپێی میدیاکانی ئێران، کەمێک پێش ئەو رووداوە، لە هەریەکە لە شارەکانی ئەسفەهان و شیرازیش دەنگی تەقینەوە بیستراوە. لەوبارەیەوە سوپای ئیسرائیل لە راگەیەندراوێکدا دەڵێت، لەو تەقینەوانەدا، دامەزراوە ئەتۆمییەکانی ئێرانیان کردووەتە ئامانج.
